Nikhoi tanö baero sola’a saitö samasui gambara logo mo’eluaha ia ba wahasambua awö wa’orahu si lö fa’aboto ba gotalua Nono Niha. Arögosali so sagö so la’a idanö kofi mo’eluaha ia ba wahasara dodo ba wangai angetula ero’ero so wamatunö ba wangahonogöi goigoi nifalua bakha ba wa’auri sero ma’ökhö. Fali’era, Lauru, Afore, sola’a saitö mo’eluaha ia sanandrösa ba wa’adölö, fa’atulö, fa lö falimo. Bola Nafo sola’ala’a mo’eluaha ia sanandrösa ba wahuwusa Nono Niha ba niha bö’ö. Eu Beringi sobulu ndru’u mo’eluaha ia sanandrösa ba wa’orahu Nono Niha ba wondrorogö Negara Indonesia andre bakha ba hasambua. Gowe, Baluse, Toho, dan Gari, sola’a aitö mo’eluaha ia ba wa’auri Nono Niha ba wondrogö hada, awö wangoguna’ö fa’abölö ba wolawa udu sedöna mamakiko fahasambua Nono Niha. Hurufo Nias ya’ia da’ö töi Danö Niha si no teturia. Töi da’a göi nifake ba wanötöi Kabupaten Daerah Tingkat II Nias. Hurufo TANO NIHA töi nifake Kabupaten Daerah Tingkat II Nias ba Li Niha. Hurufo DATATUWU sola’a saitö ya’ia da’ö motto ma slogan ma semboyan Wamareta Daerah Nias sitobali fongosambua tödö ena’ö tola so wa’aterou dodo ba wondrou’ö pembanguna ba Danö Niha. Bua Zaekhula/Mbanio sola’a aruzö mo idanö kofi mo’eluaha ia ba wangombakha ba niha salah satu mbua danö ba Daerah Nias. Fa’oyania si 17 (felewitu) ngawua manandrösa ia ba wanörö tödö ngaluo Proklamasi Kemerdekaan Republik Indonesia. Bua wakhe awö ngawuania si 45 (efawulalima) manandrösa ia ba wanörö tödö ndröfi Proklamasi Kemerdekaan Republik Indonesia. Hilihili si walu ngenoli sowulu ndru’u manandrösa ia ba wa’asökhi Danö Niha. Manandrösa göi ia ba mbawa si walu, bawa Proklamasi Kemerdekaan Republik Indonesia. Gambara Ndröfi sa’usö manandrösa ia ba wa’auri fa’alowalangi Nono Niha samati khö Lowalangi si ha Samösa.

Dua fakhe silalö, usali nisura da’a moroi ba zisambua webesitö Nias, u’irö’ö ia ba format DOC. Ufuli u’alui sumber da’a melalui mesi Google, lö tesöndra sa’e. Logo simane da’a moroi yawa tesöndra nasa ia ba webesitö Departemen Dalam Negeri ba ngenolifa Kabupaten. Lö fasala na ufuli usura ia ba Dowitowi, hewa’ae ia da’a no so dombua Kabupate Danö Niha khöda. Na’ufaigi tödögu, eluaha moroi ba Logo andre moroi yawa sindruhu wa abakha sibai nösi nia. Hewisa wamo’eluaha ya’ia ba wa’auri Nono Niha mane ma’ökhö? Tatu manö sa wa tedou ginötö ba tedou göi wangi’ila. Hiza, danedane si no lahonogöi ira satuada föna, lötebulö. Iada’a, mohalöwö ita ba wamo’eluaha ya’ia molo’ö inötö si so ya’ita. Hiza sa, ha wa’asökhi na’eluaha si so ba Logo andre moroi yawa, auri nasa ia ba wa’aurida seroma’ökhö.